Stig Torbjörnssen, yfirnjósnari Norrköping í sænsku toppbaráttunni, hefur miklar mætur á Ísaki Bergmanni Jóhannessyni og segir stórlið víða um Evrópu vera búin að setja sig í samband við félagið til að fylgjast betur með ungstirninu.

Stig segist aldrei hafa kynnst jafn miklum áhuga á einum leikmanni á starfsferli sínum en Liverpool, Juventus og Manchester United eru öll sögð fylgjast með Ísaki.

„Ég hef aldrei séð annað eins, þetta er algjörlega klikkað. Við vitum af áhuga frá stórliðum því þau hafa sett sig í beint samband við okkur," sagði Stig.

Ísak lék allan leikinn er Norrköping gerði 2-2 jafntefli við AIK í sænska boltanum í dag og svaraði spurningum um framtíðina að leikslokum.

„Ég hef alltaf haldið með Manchester United. Ég bjó í Manchester þegar faðir minn spilaði þar og horfði á marga leiki."

Fréttamaður spurði Ísak þá hvort ást hans á Man Utd myndi koma í veg fyrir möguleg félagaskipti til Liverpool.

„Ég get ekki sagt það, þeir eru að gera frábæra hluti. Man City og Liverpool hafa verið frábær að undanförnu," svaraði Ísak hlæjandi.

Ísak Bergmann á 15 ára frænda sem heitir Jóhannes Kristinn Bjarnason og þykir gríðarlega mikið efni. Hann er að æfa með unglingaliði Norrköping þessa dagana.

Sjá einnig:
Njósnari frá Liverpool sagður vera mættur á leik Norrköping
Þjálfari Norrköping: Ísak er besti leikmaður deildarinnar

STUÐNINGSSVEIT
FÓTBOLTA.NET

Tryggjum framtíð Fótbolta.net

Fótbolti.net er eini stóri fjölmiðillinn á Íslandi sem nýtur ekki ríkisstyrkja.

Gakktu í stuðningssveitina og hjálpaðu okkur að tryggja áframhaldandi öfluga umfjöllun um fótbolta.

STYRKJA

Tweet

Senda a Facebook Hafdu samband Senda frétt Prenta frétt Frétta leit