Wolfsburg og Werder Bremen áttust við í fyrsta leik helgarinnar í þýska boltanum.

Leikurinn fór afar fjörlega af stað og tók Leonardo Bittencourt forystuna fyrir gestina frá Bremen eftir tæpan stundarfjórðung.

Bote Baku og John Brooks voru þó snöggir að svara fyrir heimamenn og staðan orðin 2-1 eftir tæpan hálftíma.

Kevin Mohwald jafnaði fyrir Bremen en Wout Weghorst kom Wolfsburg aftur yfir mínútu síðar og var staðan 3-2 í leikhlé.

Wolfsburg var betra liðið á vellinum en aftur tókst gestunum að jafna þegar Brooks skoraði sjálfsmark í upphafi síðari hálfleiks.

Hart var barist næsta hálftímann en að lokum var það Weghorst sem kom knettinum í netið. Skömmu síðar fékk Mohwald sitt annað gula spjald og tíu leikmenn Bremen sáu varla til sólar út leikinn.

Bartosz Bialek gerði endanlega út um viðureignina í uppbótartíma og lokatölur 5-3 fyrir Wolfsburg sem er komið með 17 stig eftir 9 umferðir. Bremen er með 11 stig.