Wirtz er einn allra besti leikmaður Þýskalands um þessar mundir, en hann hefur verið mikilvægur hlekkur í liðinu sem trónir á toppnum í þýsku deildinni.

Þessi tvítugi sóknartengiliður hefur verið orðaður við Liverpool, Manchester City og Real Madrid síðustu vikur, en útlit er fyrir að hann verði áfram hjá Leverkusen.

„Florian er samningsbundinn Leverkusen til 2027. Það er um það bil tíminn sem hann mun eyða hjá félaginu. Það er ekkert hægt að segja hvað gerist eftir það, en við ættum að bíða með ákvörðun næstu tvö árin og sjá hvert vegurinn leiðir hann,“ sagði Hans Wirtz, faðir leikmannsins í viðtali við Kölner Stadt Anzeiger.

Framtíð Wirtz gæti auðvitað ráðist á því hvort Xabi Alonso verði áfram þjálfari liðsins eða ekki. Mörg félög munu horfa til Jeremie Frimpong, Victor Boniface og Alex Grimaldo í sumarglugganum, en hvort Leverkusen sé reiðubúið að selja þá er óvitað að svo stöddu.