Gylfi átti frábæran leik í kvöld.
Gylfi Þór Sigurðsson átti magnaðan leik í 3-2 sigri Íslands gegn Grikklandi í vináttulandsleik í Aþenu í kvöld.
Gylfi kom inn á sem varamaður í hálfleik í stöðunni 2-1 fyrir Grikkland og lagði upp tvö mörk fyrir Ísland, eitt úr aukaspyrnu á Sverri Inga Ingason og annað úr hornspyrnu fyrir Kolbein Sigþórsson.
Gylfi kom inn á sem varamaður í hálfleik í stöðunni 2-1 fyrir Grikkland og lagði upp tvö mörk fyrir Ísland, eitt úr aukaspyrnu á Sverri Inga Ingason og annað úr hornspyrnu fyrir Kolbein Sigþórsson.
Lestu um leikinn: Grikkland 2 - 3 Ísland
„Kærkominn sigur. Við byrjuðum leikinn bara ágætlega en gáfum mjög slappt víti. Þeir komast aðeins á bragðið með að skora fyrsta markið og bæta svo við öðru, en eftir markið hjá okkur í 2-1 fórum við aftur aðeins að keyra þetta í gang. Í seinni hálfleik skorum við tvö góð mörk en við vörðumst í heildina ágætlega. Það sem við æfðum í vikunni gekk vel, þetta hafa verið fínir fimm dagar eftir Danaleikinn," sagði Gylfi við Fótbolta.net.
„Það var gott að koma inn á. Mér fannst Grikkirnir þreytast svolítið, þeir voru kannski ekkert með sérstakt lið og hafa ekki verið góðir upp á síðkastið, þannig þegar við jöfnuðum fannst okkur auðvitað vera kominn tími til að klára þetta. Þegar við skoruðum þriðja markið var frekar auðvelt að halda þessu í 3-2."
Gylfi viðurkennir að sigurinn hafi verið kærkominn.
„Það er kominn tími til. Við höfum spilað nokkra leiki í röð án þess að vinna en þessi vika var fín fyrir okkur. Við fengum auðvitað smá kennslustund að spila gegn þessu leikkerfi hjá Dönunum, við náðum að bæta það í vikunni, Lars og Heimir fóru vel yfir það hvernig við áttum að verjast og við leikmennirnir töluðum saman um það. Þó við höfum verið að spila á móti frekar slöku liði Grikkja fannst mér þetta ganga betur upp og við vitum allir meira um það hvernig við eigum að verjast á móti þessu leikkerfi," sagði Gylfi.
„Það hefur gengið vel hjá okkur þegar við erum að sitja til baka og tímasetja pressuna. Við vorum að reyna að pressa í hvert einasta skipti á móti Dönum og það gekk engan veginn. Ég held að Lars og Heimir hafi séð það og við vorum mikið að vinna í því síðustu þrjá daga."
Athugasemdir
