Moises Llorens, virtur spænskur fréttamaður sem starfar fyrir ESPN, heldur því fram að úrúgvæski sóknarmaðurinn Edinson Cavani ætli að vera áfram hjá Manchester United á næstu leiktíð.
Cavani er 34 ára gamall og rennur út á samningi í sumar. Hann var orðaður sterklega við Boca Juniors þar sem hann var talinn ekki vilja vera áfram í Manchester.
Sú skoðun hans hefur breyst eftir gott gengi Rauðu djöflanna. Cavani hefur verið í stuði að undanförnu og átti stórleik í 6-2 sigri gegn Roma í undanúrslitum Evrópudeildarinnar í vikunni.
Cavani er kominn með fimm mörk í síðustu fimm leikjum með Man Utd eftir að hafa aðeins gert sjö mörk í fyrstu 28 leikjunum.
Moises heldur því fram að þessar fregnir verði staðfestar í næstu viku. Cavani mun spila annað ár hjá Rauðu djöflunum.
Athugasemdir
