Þorlákur hrósaði Ingu Birnu Friðjónsdóttur sérstaklega fyrir góðan leik.
Þorlákur Árnason þjálfari Stjörnunnar var mjög ánægður með seinni hálfleik sinna stúlkna í 4-0 sigrinum gegn Breiðablik í Pepsi deildinni, en þar skoruðu þær einmitt öll fjögur mörk sín.
„Þetta var góður seinni hálfleikur sem að skóp þennan sigur. Við misstum tvo leikmenn í veikindi rétt fyrir leik og þurftum að breyta svolítið miklu og það var svolítið bras, það var ekki jafnvægi í liðinu. En þegar við skiptum í hálfleik kom meira jafnvægi í liðið, munurinn á liðunum kom á ljós í seinni hálfleik,“ sagði Þorlákur við Fótbolta.net.
Ashley Bares átti frábæran leik og skoraði þrjú af mörkum Stjörnunnar, en hitt skoraði Ásgerður Stefanía Baldursdóttir úr vítaspyrnu. Þorlákur var ánægður með spilamennsku Ashley og í raun alls liðsins.
„Við erum náttúrulega með frábæran framherja, það vita það svosum allir orðið, en svo var Inga Birna líka alveg frábær í seinni hálfleik. Allt liðið var gott, þetta var einn af okkar bestu hálfleikjum í sumar, það er engin spurning.“
Eftir sigurinn í kvöld og tap Vals í Vestmannaeyjum er Stjarnan komin á topp Pepsi deildar kvenna með tveggja stiga forskot. Þorlákur vill þó að liðið sitt haldi sig á jörðinni.
„Ég held að það breyti ekki miklu, við erum bara eins og öll önnur lið að reyna að safna stigum. Þetta er jafnara en það hefur verið áður, það vita það allir, en við getum ekki farið í neinn leik áður en að undirbúa okkur vel. Ég held að þetta gefi leikmönnum bara sjálfstraust að spila vel, það er alltaf þannig. Ef þú vinnur og gengur vel er líklegra að þú vinnir næsta leik.“
