Magnús ræðir við leikmenn sína í kvöld.
Magnús Gylfason þjálfari Hauka var himinlifandi með að taka þrjú stig úr leiknum í kvöld er Haukar mættu Víking Ólafsvík á heimavelli. Haukarnir buðu ekki upp á neinn sambabolta í leiknum í kvöld en gerðu það sem þurfti, skora mark og halda hreinu. ,,Spilamennskan var svolítið mér að kenna í kvöld," sagði Magnús til að mynda.
,,Ég var mjög ósáttur með fyrri hálfleikinn, en svona heilt yfir fannst mér þetta nokkuð jafnt en það hefði ekki komið mér neitt á óvart hefðu þeir jafnað metin, þeir eru með stóra stráka og voru að dæla boltanum inn í teiginn og Daði var sterkur í markinu og Guðmundur Viðar Mete er að koma mjög sterkur inn í hafsentinn," sagði Magnús Gylfason en Guðmundur Viðar Mete er búinn að missa af mörgum leikjum í sumar vegna meiðsla en virðist vera kominn í ágætis stand núna.
,,Heilt yfir hefði jafntefli verið sanngjörn úrslit, þeir skalla í slánna og eru að fá ágætis færi sem Daði er að verja en við vorum líka að fá góð færi og við unnum í dag og við erum með markaskorara í liðinu og hann skorar yfirleitt þegar hann spilar og ég er rosalega ánægður með það, " sagði Magnús sem talar þá um Hilmar Rafn Emilsson sem skoraði eina mark leiksins í kvöld en hann hefur verið að glíma við meiðsli eins og svo oft áður að undanförnu.
Viðtalið í heild sinni við Magnús er hægt að sjá í sjónvarpinu hér að ofan.
