Ólafur í áfalli eftir að hafa haldið að Þróttur hafi jafnað metin.
,,Það var brjáluð spenna en við kláruðum þetta, sigldum þessu í höfn. Það var það sem við ætluðum okkur og gerðum, ótrúlega vel gert," sagði Ólafur Brynjólfsson þjálfari Breiðabliks eftir 0-1 sigur á Þrótti í Pepsi-deild kvenna í kvöld en fyrri leik liðanna í fyrstu umferð hafði lokið með jafntefli.
,,Það er framför, við tókum þrjú stig í staðinn fyrir eitt og á það ætlum við að leggja áherslu. Að taka þessi stig sem við höfum tapað í fyrri umferðinni og klára seinni umferðina með sæmd."
,,Það var smá stress þessar síðustu 10-15, að ætla að halda og sigla þessu í höfn. Við hefðum kannski átt að skora úr nokkrum færum en ég er ótrúlega ánægður með liðið. Þetta lítur vel út, það er sami mannskapur og bara gleði og við ætlum okkur að klára þessa leiki sérstaklega og síðan er hitt bara plús."
Þróttarar gerðu harða hríð að marki Blika í lokin og svo virtist sem þær hafi náð að skora en Birna Kristjánsdóttir markvörður Blika varði ótrúlega vel. Ólafur missti sig úr spennu og lá á endanum sjálfur í grasinu við þett tilefni.
,,Hjartað fór bara í yfirslag, það er bara þannig. Ég þurfti að ná því aðeins niður, maður er bara keppnismaður og vill vinna, það var ótrúlega sætt að sjá að Birna hafi varið svona stórkostlega."
