Magnús Már Einarsson skrifar frá Albaníu
Geir Þorsteinsson.
,,Ég hef sjaldan verið jafn stoltur af íslenska landsliðinu og í kvöld. Við vorum í mótbyr frá fyrstu stundu út af óheppilegum atvikum í dag og veðrið var mjög erfitt fyrir knattspyrnu. Allan leikinn fannst mér við vera betri, sýndum meiri karakter og spiluðum vel útfærðan leik. Ég er virkilega stoltur og ánægður með þessi stig," sagði Geir Þorsteinsson formaður KSÍ við Fótbolta.net eftir 2-1 sigur Íslands á Albaníu í kvöld.
Ummæli Arons Einars Gunnarssonar landsliðsfyrirliða í viðtali við Fótbolta.net í gær hafa verið mikið til umfjöllunar í dag en Geir var ánægður með hvernig Aron og aðrir leikmenn Íslands brugðust við í kvöld.
,,Ég hefði kostið að undirbúningurinn hefði verið betri en ég dáist af strákunum. Það var annað hvort að þetta hefði mikil áhrif á liðið eða að þeir myndu þjappa sér saman sem þeir gerðu. Mér fannst Aron rísa undir því á leikvellinum að vera fyrirliði en síðan eru aðrir hlutir sem við verðm að skoða."
Geir vill ekki svara því fyrir vissu hvort Aron verði áfram fyrirliði íslenska landsliðsins eða ekki.
,,Hann er kominn í leikbann og verður ekki með á móti Sviss. Við skoðum málið og förum yfir þetta. Við getum ekki undirbúið okkur á þennan hátt eins og í dag."
Geir stóð í ströngu í dag en hann ræddi meðal annars við formann knattspyrnusambands Albaníu vegna málsins.
,,Það hafa komið mikið af skeytum og símtölum sem eðlilegt er. Ég hef unnið að því að biðjast afsökunar sem gerðist í gær og formaður knattspyrnusambandsins hér var sáttur við mig eins og hægt var fyrir leikinn. Ég lagði mikla áherslu á það. Ég þekki hann vel og við kvöddumst sáttir fyrir leikinn."
Geir segir að Albanir erfi ekki ummæli Arons og hann segir að KSÍ erfi ekki mistök sem urðu fyrir leikinn í kvöld.
,,Þeir gerðu mistök fyrir leik sem við munum ekki erfa við þá. Þeir settu þjóðfána Slóveníu út á völlinn í stað íslenska fánans. Ég brást snöggt við í stúkunni og hrópaði á þá. Þeir voru snöggir, rétt áður en liðið okkar labbaði út, að koma með íslenska fánann og við löbbuðum út undir réttum fána."
,,Það geta allir gert mistök, þeir læra af sínum og við lærum af okkar. Okkar voru alvarleg og bæði ég og þjálfarinn lítum þeim alvarlegum augum. Við getum ekki undirbúið okkur eða komið fram á þennan hátt."
Hér að ofan má sjá viðtalið við Geir í heild sinni.
Athugasemdir
