„Í fyrri hálfleik fannst mér KR öflugri en við. Mér fannst við ekki nýta okkur þær stöður sem við fengum nægilega vel sérstaklega í byrjun, segir Rúnar Kristinsson, þjálfari Fram, eftir 1-0 tap gegn KR í kvöld.
Lestu um leikinn: Fram 0 - 1 KR
Frammistaða Fram var þó betri í seinni hálfleik og hefði heppnin verið með þeim hefði jöfnunarmarkið komið.
„Í seinni hálfleik vorum við miklu, miklu öflugri og pressum þá mjög hátt. Við fengum fullt af hálffærum og tvö eða þrjú dauðafæri en því miður þá vildi boltinn ekki í netið í dag."
KR-ingar bökkuðu langt niður í seinni hálfleik sem kom mörgum á óvart, en ekki Rúnari.
„Í seinasta leik voru þeir að verja forskotið sitt eftir að þeir komust yfir og í fyrri hálfleik þar gerðu þeir það líka. Það er bara eðlilegt, þú þarft að verjast í fótbolta. Þeir breyta aðeins til í seinasta leik og aftur í dag. Þú vilt ná í stig og vinna fótboltaleiki, það er ekki alltaf hægt að fara fram með alla og taka alla sénsa í heiminum. Ég átti alveg eins von á því að þeir myndu falla niður ef við myndum hræða þá aðeins með góðri pressu og stela boltanum."
Fram hafa nú aðeins sótt 3 stig af seinustu 15 mögulegum. Framundan eru þrír leikir sem skera úr um hvort liðið endi í efri hlutanum.
„Við erum tilbúnir í þessa baráttu. Við höfum verið þarna í allt sumar á þessum slóðum og höfum haft tækifæri til þess að styrkja stöðu okkar í efri hlutanum en erum núna komnir í neðri hlutann. Þetta er gríðarlega jafnt og við eigum KA næst.
Athugasemdir
