Sambandsdeildin: Víkingur snéri taflinu við og fer til Eistlands

Víkingur er komið áfram í næstu umferð forkeppni Sambandsdeildarinnar eftir sigur á Egnatia ytra í kvöld.

Víkingur var með bakið uppvið vegg fyrir leikinn þar sem liðið tapaði fyrri leiknum 1-0 í Víkinni. Víkingur hóf leikinn af krafti og það bar árangur eftir tæplega hálftíma leik þegar Gísli Gottskálk Þórðarson átti skot sem fór af tveimur varnarmönnum og sveif í netið.

Víkingur hefði getað komist í forystu í einvíginu fyrir lok fyrri hálfleiks þegar Danijel Dejan Djuric var í dauðafæri en hann skaut yfir markið.

Það kom ekki að sök því strax í upphafi síðari hálfleiks skoraði Aron Elís Þrándarson eftir að boltinn barst til hans af varnarmanni Egnatia inn á markteiginn og eftirleikurinn auðveldur fyrir Aron.

Egnatia fékk tækifæri til að jafna metin í einvíginu en Ingvar Jónsson átti stórkostlega vörslu þegar leikmaður Egnatia var í dauðafæri. Egnatia setti mikla pressu á Víkinga í uppbótatíma en náði ekki að ógna mikið og sigur Víkinga staðreynd. Víkingur mætir Flora frá Eistlandi í næstu umferð en fyrri leikurinn fer fram í Víkinni.