Lengjubikarinn: Kristófer Ingi tryggði Blikum jafntefli gegn Vestra

Breiðablik á ennþá möguleika á að komast áfram í undanúrslit eftir jafntefli gegn Vestra í Lengjubikarnum í dag.

Það var markalaust í hálfleik en Vestri komst yfir þegar Pétur Bjarnason komst í gegn og setti boltann snyrtilega framhjá Antoni Ara.

Morten Ohlsen Hansen í liði Vestra fékk hins vegar að líta rauða spjaldið þegar hann braut á Eyþóri Wöhler sem náði boltanum af Morten og slapp í gegn en Morten stöðvaði hann og fékk réttilega að líta rauða spjaldið.

Þegar skammt var til loka leiksins fékk Breiðablik vítaspyrnu þegar brotið var á Kristófer Inga Kristinssyni inn í teignum. Hann steig sjálfur á punktinn og skoraði af miklu öryggi og tryggði Blikum stig.

Blikar eru með sjö stig í 4. sæti riðilsins og mæta Keflvíkingum í síðustu umferð. Ef Blikar vinna Keflvíkinga vinna þeir riðilinn og komast áfram í undanúrslit keppninnar.