Willum Þór
Á A-landsliðsæfingu í mars.
Willum Þór Willumsson er leikmaður BATE Borisov í Hvíta-Rússlandi. Hann er uppalinn Bliki en fór út eftir tímabilið 2018 á Íslandi. Hann er 23 ára miðjumaður sem á að baki einn A-landsleik.
Willum er staddur á Íslandi og ræddi við Fótbolta.net í dag. Hann glímdi við meiðsli stærstan hluta síðasta árs og var því fyrst spurt út í stöðu mála varðandi meiðslin. Alls spilaði hann 245 mínútur í deildinni á síðasta tímabili, einungis ellefu mínútur seinni hluta tímabilsins.
Willum er staddur á Íslandi og ræddi við Fótbolta.net í dag. Hann glímdi við meiðsli stærstan hluta síðasta árs og var því fyrst spurt út í stöðu mála varðandi meiðslin. Alls spilaði hann 245 mínútur í deildinni á síðasta tímabili, einungis ellefu mínútur seinni hluta tímabilsins.
„Staðan er fín, ég er að verða betri með hverjum deginum, líður ágætlega í hnénu eins og er og er í fínasta formi þannig séð. Ég var eitthvað meiddur í náranum á síðasta tímabili, byrjaði að spila og fór í kjölfarið í aðgerð á hnénu og var meiddur út tímabilið eftir hana. Ég er fyrsta skipti núna að koma til baka," sagði Willum.
„Lífið utan vallar er mjög fínt, fínasta borg sem ég bý í og ég er búinn að koma mér vel fyrir þarna og er frekar ánægður."
Willum býr í Minsk sem er í rúmlega hálftíma fjarlægð frá Borisov þar sem BATE spilar og æfir.
„Það eru nokkur lið sem spila skemmtilegan fótbolta en inn á milli getur þetta verið dálítið mikil harka og „fight". Þetta er bara fótbolti eins og alls staðar annars staðar."
BATE er sigursælasta lið Hvíta-Rússlands en hefur ekki unnið titilinn undanfarin ár. „Kröfurnar eru bara fyrsta sætið og ekkert annað. Það er eiginlega óásættanlegt að ná því ekki, kröfurnar eru alltaf að vinna titilinn. Forsetinn setur kröfu á árangur, stuðningsmenn og við sjálfir leikmennirnir. Hefðin í klúbbnum er bara fyrsta sætið."
„Við erum að yngja upp hópinn, fyrst þegar ég kom vorum við mjög gamalt lið en mjög gott. Núna er byrjað að yngja upp liðið, verið að sækja yngri og efnilegri leikmenn og hópurinn styrktur þannig - allavega til framtíðar."
Willum á hálft ár eftir af samningi. „Ég fer út núna á næstu dögum, byrja að æfa, vonandi helst heill og byrja að spila. Svo sé ég bara til hvað ég geri, hvort ég verði áfram eða fari einhvert annað."
„Ég er búinn að vera hjá liðinu í þrjú ár þannig ég hef alveg hugsað um að kannski væri fínt að fara prófa eitthvað annað. Ég er sáttur þarna eins og er þannig ég er ekkert að flýta mér."
Hann var einnig spurður út í kallið í A-landsliðið í mars í fyrra. Svo í lok viðtalsins var Willum spurður út í húfuna sem hann var með í viðtalinu. 'Pandagang' er vörumerki sem bróðir hans, Brynjólfur, er með ásamt þeim Alfons Sampsted og Guðjóni Pétri Lýðssyni.
Er bróðir þinn að plata þig til að vera með þessa húfu eða finnst þér þetta svona töff? „Mér finnst þetta svona töff, þægilegar og góðar húfur. Ég er í buxunum hans núna eins og er, ég stel nokkrum fötum frá honum," sagði Willum léttur að lokum.
Athugasemdir
