Kári vill sjá fullan völl
„Spennustigið er fínt sko og það eykst bara þegar við erum búnir með þennan Liechtenstein leik, þannig að þetta verður bara gaman," sagði Kári Árnason, miðvörður íslenska landsliðsins, fyrir leikinn gegn Liechtenstein á mánudaginn.
Íslenska liðið hefur ekki verið að spila vel síðan liðið tryggði sig inn á Evrópumótið og Kári segir það mikilvægt að snúa blaðinu við.
„Við erum líka ósáttir við margt í hinum æfingaleikjunum sem voru á undan, þannig að við verðum auðvitað að snúa við blaðinu."
Vörnin hefur ekki verið nægilega sterk hjá íslenska liðinu eftir frábæra undankeppni varnarlega, en Kári segir að allt liðið verði að fara að verjast aftur sem lið.
„Það er algjörlega það. Það sem við gerðum vel var að við vörðumst gríðarlega vel sem lið, en það er það sem hefur verið að klikka í æfingaleikjunum. Við erum ekki að verjast nægilega vel sem lið."
Þetta er síðasti leikur Íslands á Laugardalsvelli undir stjórn Lars Lagerback og Kári vill auðvitað sjá fullan völl.
„Það er náttúrulega lykilatriði og ég skil ekki af hverju það er ekki orðið uppselt til þess að kveðja kallinn og að kveðja landsliðið á góðu nótunum áður en við förum út," sagði Kári að lokum.
Viðtalið má í heild sinni sjá í spilaranum hér að ofan.
Athugasemdir
