Sigurvin Ólafsson: Við erum ekkert spilaðir út af vellinum

„Að mörgu leyti er ég stoltur af strákunum. Þetta er auðvitað eldskírn í þessari deild og við erum búnir að vera rísa úr neðri deildum á síðustu tveimur árum. Þetta eru auðvitað mjög mikil viðbrigði að mæta beint á útivöll á móti kandídötum þeirra sem eiga víst að vinna þessa deild."

„Það er auðvitað bara hraði og styrkur. Svo bara reynsla í litlu hlutunum. Þú kemst upp með miklu meira í neðri deildunum auðvitað. Bæði varnarlega, en hér á hærra leveli þurfa menn að vera vakandi alveg í 90 mínútur með allt upp á 10. Það vantaði í raun rosa lítið upp á hvað það varðar í dag, ég get ekkert verið svekktur út í einn eða neinn í mínu liði. Svo eru bara litlir hlutir sem að reynslu meiri menn ná að nýta sér eins og Fylkismenn eru uppfullir af mönnum með leiki í efstu deild," sagði Sigurvin aðspurður um muninn á Lengjudeildinni og neðri deildum.

KV-menn áttu undir högg að sækja í upphafi leiks en voru búnir að hrista af sér sviðskrekkinn þegar líða tók á fyrri hálfleikinn.

„Mér fannst allt í lagi að Fylkir væri meira með boltann. Mér fannst þeir ekkert vera búa til neitt rosalega mikið til. Svo koma bara mörk upp úr þannig séð engu. Þetta fyrsta mark er náttúrulega eftir horn og annað markið þá kiksar hann, ég veit svosem ekki hvernig hann endaði í netinu almennilega. Við erum allavega ekkert spilaðir út af vellinum og þeir ýta boltanum yfir línuna. Þetta var ekkert þannig. Svo bara jafnt og þétt fengum við meira sjálfstraust. Eins og þú segir sviðskrekkurinn rann af okkur og ég satt að segja bara fann ekki annað en að 2 - 2 væri bara á leiðinni þarna í seinni hálfleik. Mér fannst stemningin og spilamennskan vera þannig,"  sagði Sigurvin Ólafs eftir leik. Óhætt að segja að hann getur verið stoltur með sitt lið í kvöld.