Lið vikunnar í enska - Mitoma og Tete í fyrsta sinn

Markvörður: David de Gea (Man Utd) - Bjargaði þremur stigum fyrir Rauðu djöflana gegn Crystal Palace með frábærri frammistöðu um helgina.

Miðvörður: Nayef Aguerd (West Ham) - Steig varla feilspor og hafði góðar gætur á Callum Wilson í 1-1 jafntefli gegn Newcastle.

Miðvörður: James Tarkowski (Everton) - Átti magnaðan leik gegn Eddie Nketiah og félögum í Arsenal. Hann kórónaði frammistöðuna með sigurmarki.

Miðvörður: Craig Dawson (Wolves) - Einn af bestu leikmönnum Wolves í frægum 3-0 sigri gegn Liverpool.

Hægri vængbakvörður: Emerson Royal (Tottenham) - Virkilega öflugur á hægri vængnum gegn sprækum Jack Grealish. Emerson seldi sig aldrei og leit út fyrir að vera leikmaður í heimsklassa, eitthvað sem getur verið þveröfugt á öðrum degi.

Miðjumaður: Ruben Neves (Wolves) - Fékk alltof mikinn tíma til að athafna sig á miðjunni og áttu leikmenn Liverpool mjög erfitt með að klukka Neves sem skoraði eitt markanna þriggja í frábærum sigri.

Miðjumaður: Amadou Onana (Everton) - Mögulega hæfileikaríkasti leikmaður innan herbúða Everton og var hann afburðagóður þegar topplið Arsenal kíkti í heimsókn um helgina. Onana var frábær og átti stóran þátt í sigrinum með vinnuseminni og gæðunum sem hann sýndi á miðjum vellinum.

Vinstri vængbakvörður: Tete (Leicester) - Nýkominn í enska boltann og strax búinn að skora. Tete fór frábærlega af stað með sínu nýja félagi, hann var settur beint í byrjunarliðið og skoraði þriðja mark Leicester í 2-4 sigri. Þó hann sé settur í stöðu vængbakvarðar hér er Tete miklu meiri kantmaður.

Vinstri kantur: Marcus Rashford (Man Utd) - Búinn að vera sjóðandi heitur að undanförnu og var ekkert lát á því í 2-1 sigri gegn Crystal Palace þar sem hann skoraði og lagði upp.

Hægri kantur: Kaoru Mitoma (Brighton) - Sá er búinn að stíga fram í sviðsljósið. Mitoma gerði sigurmarkið gegn Bournemouth um helgina og er kominn með fimm mörk og eina stoðsendingu í síðustu sjö leikjum.

Sóknarmaður: Harry Kane (Tottenham) - Leikmaður sem þarfnast ekki kynningar. Skoraði mark númer 200 á úrvalsdeildarferlinum sem reyndist sigurmarkið gegn Englandsmeisturum Manchester City í gær. Einn af allra bestu sóknarmönnum í sögu ensku úrvalsdeildarinnar.