'Mér finnst þetta geggjað'
„Svekkjandi ef ég á að vera hreinskilinn. Mér fannst þetta vera leikur tveggja hálfleika ef ég á að vera hreinskilinn, fannst við aðeins ofan á í fyrri og fórum aðeins of aftarlega í seinni sem var ekki planið hjá okkur," segir Damir Muminovic, fyrirliði Grindavíkur, eftir jafntefli gegn Vestra á útivelli í fyrstu umferð Lengjudeildarinnar.
Lestu um leikinn: Vestri 1 - 1 Grindavík
„Þeir byrjuðu að sækja meira og meira á okkur og einhvern veginn dettur boltinn fyrir þá og þeir skora. Kannski bara sanngjarnt eftir á. Ég er ekki með skýringu á þessu, við þurfum að fara yfir þetta og gera betur næst. Þetta er fyrsti leikur og það er ekki auðvelt að koma hingað og ná í þrjú stig. Kannski er ég að setja of mikla kröfu á mig sjálfan og liðið, kannski er liðið bara gott."
„Mér finnst þetta geggjað, ég held ég hefði örugglega ekki verið ánægður ef ég hefði farið eitthvert annað en til Grindavíkur. Ég er búinn að vera hérna í nokkra mánuði, vel tekið á móti mér af fólkinu í kringum klúbbinn og liðið. Við erum með góðan þjálfara, Ray er góður maður og auðvelt að bakka hann upp í þeim hlutum sem hann vill gera. Þannig ég er virkilega ánægður," segir Damir um lifið hjá nýju félagi og ákvörðun sína að semja við félagið í vetur.
„Við höfum trú á hópnum sem við erum með, ég skipti mér ekki af planinu á leikmannamarkaðnum, þjálfarinn og stjórnin sjá um það."
„Það er geggjað, Gulli er virkilega efnilegur, U19 landsliðsmaður og geggjað að fá hann. Vonandi springur hann út hjá okkur," sagði Damir um komu Gunnleifs Orra Gunnleifssonar (2008) sem kom frá Breiðabliki í gær.
