Elías Már og félagar eru að gera flotta hluti í hollensku úrvalsdeildinni
Elías Már Ómarsson og félagar hans í hollenska liðinu NAC Breda unnu annan leik sinn í röð er þeir unnu Spörtu Rotterdam, 2-0, í úrvalsdeildinni í kvöld.
Breda er nýliði í deildinni og hefur heldur betur komið á óvart en liðið er í baráttu um Evrópusæti þegar deildin er tæplega hálfnuð.
Í dag vann liðið annan leik sinn í röð og spilaði Elías allan leikinn í fremstu víglínu.
Breda er í 7. sæti með 22 stig eftir fimmtán umferðir.
Hólmbert Aron Friðjónsson sneri aftur úr meiðslum er Preussen Munster tapaði fyrir Magdeburg, 2-1, í þýsku B-deildinni.
HK-ingurinn hafði ekki spilað í síðustu þremur leikjum Munster vegna meiðsla en lék síðasta stundarfjórðunginn í kvöld.
Hólmbert hefur skorað tvö mörk með liðinu á tímabilinu en bæði mörkin gerði hann í september.
Munster er í næst neðsta sæti með 12 stig úr fimmtán leikjum.
Athugasemdir
