Gianluigi Buffon, markvörður Juventus, staðfesti „eilífa æsku" sína með frammistöðunni í 2-1 sigrinum gegn Napoli í gær.

Þetta segir í umfjöllun Il Corriere dello Sport um leikinn en Buffon fær mikið lof í ítölskum fjölmiðlum og Tuttosport gefur honum 8 í einkunn og velur hann sem mann leiksins.

Tímabilið hefur verið mikil vonbrigði hjá Juventus en sigurinn í gær var nauðsynlegur í baráttunni um Meistaradeildarsæti. Buffon varði allt sem á mark hans kom, nema vítaspyrnu.

Þá er honum hrósað fyrir stjórnunarhæfileika sína í gær en þessi 43 ára markvörður var settur í markið eftir að Wojciech Szczesny hefur verið mjög ósannfærandi að undanförnu og gert dýrkeypt mistök.