Alexis Sanchez er laus allra mála hjá Inter eftir að hann komst að samkomulagi um að rifta samningi sínum við félagið. Þetta kemur fram í yfirlýsingu Inter í dag.
Sílemaðurinn hefur verið á mála hjá Inter síðustu þrjú tímabil en hann var á láni frá Manchester United á fyrstu leiktíðinni áður en ítalska félagið gerði skiptin varanleg.
Sanchez, sem er 33 ára gamall, kom að 43 mörkum í 108 leikjum fyrir Inter og vann Seríu A á tíma sínum þar.
Hann hefur verið í viðræðum við félagið um að rifta samningi sínum síðustu vikur en Inter staðfesti tíðiindin í dag. Sanchez er nú frjáls ferða sinna en hann mun skrifa undir hjá franska félaginu Marseille á næstu dögum.
Sanchez mun skrifa undir tveggja ára samning við Marseille en það verður níunda félagið sem hann spilar fyrir á ferlinum.
Marseille hafnaði í 2. sæti frönsku deildarinnar á síðustu leiktíð og mun spila í Meistaradeild Evrópu.
Athugasemdir