Sky Sports greinir frá því að starf ástralska þjálfarans Ange Postecoglou hjá Tottenham er ekki í hættu eins og er, þrátt fyrir slök úrslit í síðustu leikjum.
Tottenham er óvænt í neðri hluta ensku úrvalsdeildarinnar, með 20 stig eftir 15 umferðir. Liðið er þó búið að skora 31 mark á deildartímabilinu, sem er næstmest allra liða eftir Chelsea.
Daniel Levy forseti Tottenham hefur trú á Postecoglou og eiga þeir í miklum samskiptum. Starf Postecoglou er því ekki í hættu en það gæti hitnað undir honum ef svona slappt gengi heldur áfram yfir jólatörnina og fram á nýtt ár.
Levy hefur trú á því að þetta Tottenham lið geti gert góða hluti undir stjórn Postecoglou en hann áttar sig á því að mikil meiðslavandræði hafa sett strik í reikninginn, sérstaklega í varnarlínunni þar sem Micky van de Ven og Cristian Romero hafa verið að glíma við meiðsli.
Þrátt fyrir slakt gengi í úrvalsdeildinni er Tottenham í góðri stöðu í Evrópudeildinni og komið í 8-liða úrslit deildabikarsins.
Tottenham heimsækir Rangers til Skotlands í næstu umferð Evrópudeildarinnar á fimmtudaginn og getur komið sér í afar sterka stöðu fyrir síðustu tvær umferðir deildarkeppninnar.
Í næstu viku spilar liðið svo við Manchester United í 8-liða úrslitum deildabikarsins eftir heimsókn til Southampton í úrvalsdeildinni um helgina.
Tottenham stefnir á að styrkja leikmannahópinn í janúar og gætu rétt kaup hjálpað Postecoglou við að snúa genginu við.
Athugasemdir
