England: Bruno Guimaraes tryggði sigurinn í Nottingham

Nottingham Forest tók á móti Newcastle United í lokaleik dagsins í ensku úrvalsdeildinni og úr varð hörkuviðureign.

Gestirnir frá Newcastle tóku forystuna í tvígang í fyrri hálfleik en alltaf tókst heimamönnum í Nottingham að jafna.

Bruno Guimaraes skoraði fyrsta mark leiksins en Anthony Elanga jafnaði metin í jöfnum fyrri hálfleik. Fabian Schär kom gestunum yfir á ný undir lok fyrri hálfleiks en Callum Hudson-Odoi tókst að jafna seint í uppbótartímanum.

Staðan var því 2-2 í leikhlé og ríkti áfram þokkalegt jafnræði með liðunum í síðari hálfleik, en leikmönnum tókst ekki að skapa góð færi.

Brasilíski miðjumaðurinn Guimaraes átti frábæran leik og skoraði sitt annað mark á 66. mínútu til að koma Newcastle yfir í þriðja sinn.

Það reyndist sigurmarkið þrátt fyrir tilraunir Forest, sem sköpuðu þó ekki mikla hættu.

Newcastle er í sjöunda sæti eftir þennan sigur, tveimur stigum eftir Manchester United í sjötta sætinu.

Nottingham Forest er áfram í fallbaráttu, aðeins tveimur stigum fyrir ofan fallsvæðið.