Toney: Leikmenn Man City eru manneskjur og manneskjur geta tapað leikjum

Ivan Toney gerði tvennu í leiknum en hann kom Brentford yfir með flottu skallamarki áður en Phil Foden jafnaði með þrumufleyg.

Það var síðan á áttundu mínútu uppbótartímanns sem Brentford tryggði sér sigurinn eftir laglega skyndisókn. Josh Dasilva fann þá Toney sem skilaði knettinum í netið af stuttu færi.

„Við erum gott lið og við getum gert svona hluti. Leikmenn Manchester City eru manneskjur og manneskjur geta tapað leikjum. Við áttum þennan sigur skilið," sagði Toney í viðtali við BT Sport beint eftir leik.

Þessi öflugi sóknarmaður var ekki valinn í enska landsliðshópinn sem fer á HM en Callum Wilson, framherji Newcastle, fékk sæti í hópnum.

„Auðvitað var ég vonsvikinn að vera ekki valinn en ég læt það ekkert stoppa mig."

Frábært svar hjá Toney í dag, tvenna og sigur á Englandsmeisturunum.