Markvörðurinn meiddist illa í byrjun síðari hálfleiks gegn Eyjamönnum og ekkert spilað síðan.

Ásgeir, sem var aðalmarkvörður Keflvíkinga á síðustu leiktíð, fékk niðurstöður úr segulómun á dögunum og kom þar í ljós að hann væri með slitið aftari krossband og verður því frá út tímabilið.

Eins og kom fram í kvöld hefur Keflavík brugðist við þessum meiðslum Ásgeirs en Sindri Kristinn Ólafsson gekk aftur í raðir félagsins frá FH og mun verja mark liðsins í sumar.

Valur bauð í Ásgeir Orra í síðasta mánuði og voru einhverjar þreifingar í gangi vegna meiðsla Ögmundar Kristinssonar. Átti Ásgeir þá að hlaupa í skarðið, en Ragnar Aron Ragnarsson, framkvæmdastjóri Keflavíkur, sagði í samtali við Fótbolta.net að Ásgeir væri ekki til sölu og væru litlar líkur á að hann yrði seldur innanlands.

Ásgeir, sem er fæddur árið 2004, stóð sig gríðarlega vel í marki Keflavíkur á síðasta tímabili og eðlilegt að hann hafi vakið áhuga stærri liða, en Keflavík fór alla leið í úrslit Lengjudeildarumspilsins og í 8-liða úrslit Mjólkurbikarsins. Eftir tímabilið gerði hann langtímasamning við Keflavík.

Frammistaða hans skilaði honum sæti í U21 árs landsliðinu og lék hann sinn fyrsta leik þar í 2-1 sigri á Póllandi í nóvember á síðasta ári.