Vincent Kompany stjóri Burnley vonast til að Wout Weghorst endi tímabilið vel með Manchester United en hann er á láni frá Burnley.
Weghorst gekk til liðs við Burnley frá Wolfsburg fyrir rúmu ári síðan en hann vildi ekki spila í Championship deildinni eftir að Burnley féll. Hann fór á láni til Besiktas en Erik ten Hag nældi í hann í janúar.
Hann hefur ekki staðið undir væntingum og þykir ólíklegt að hann verði áfram á Old Trafford. Líklegt þykir að úrslitaleikurinn í enska bikarnum gegn Man City verði hans síðasti leikur fyrir félagið.
Kompany, fyrrum leikmaður City ætlar að ræða við Weghorst eftir tímabilið.
„Hann er leikmaður Burnley sem hefur spilað í topp fjórum í úrvalssdeildinni fyrir Man Utd og einnig fyrir hollenska landsliðið. Það er erfitt fyrir mig að segja það út af bikarúrslitunum en aðalatriðið fyrir mig er að hann ljúki tímabilinu á góðum nótum. Við munum spjalla saman," sagði Kompany.