Lars Lagerback.
,,Varnarlega var þetta nánast fullkominn leikur. Sóknarlega hefðum við getað farið betur með boltann en þegar við skorum gegn Hollendingum er mikilvægt að vera þolinmóðir og einbeita sér að vörninni. Við sögðum það við leikmenn í hálfleik. Auðvitað vildum við hafa boltann meira en varnarleikurinn var í heimsklassa. Við sköpuðum líka færi og markskotin enduðu 3-3. Það er til mismunandi leiðir til að spila fótbolta," sagði Lars Lagerback annar af landsliðsþjálfurum Íslands eftir magnaða 2-0 sigurinn á Hollandi í kvöld.
Arjen Robben, einn af betri sóknarmönnum heims, átti erfitt uppdráttar í kvöld en íslenska vörnin lokaði alveg á hann.
,,Við reyndum alltaf að hafa hjálparvörn. Við reyndum að hafa þrjá leikmenn nálægt sem hjálpuðu bakvörðunum. Birkir, Aron og Ragnar gerðu það og meira segja Kolbeinn stundum. Það var frábærlega gert hjá leikmönnunum."
Ari Freyr Skúlason var á móti Robben í fyrri hálfleik en hann fór meiddur af velli í hálfleik.,,Hann fékk hné í læriðfrá Robben. Við reyndum að meðhöndla hann en hann gat ekki hlaupið."
Jón Daði Böðvarsson hefur komið gríðarlega sterkur inn í íslenska liðið í undankeppninni og hann var frábær í kvöld.
,,Það verður að taka inn í reikninginn að hann er ennþá í U21 árs liðinu og hafði einungis spilað nokkra vináttuleiki fyrr. Hann er klár með boltann, bæði í vörn og sókn. Við viljum nota framherjana varnarlega líka. Hann tekur réttar ákvarðanir þó hann sé ungur og reynslulítill. Með smá heppni hefði hann getað skorað í dag. Það er samt hægt að tala um alla leikmennina í dag. Þeir stóðu sig allir vel," sagði Lars.
,,Hann hefur verið virkilega góður í öllum þessum leikjum.
Friðrik Ellert Jónsson, sjúkraþjálfari íslenska landsliðsins, stjórnaði sigursöngvum inni í klefa eftir leik. Lars og Heimir Hallgrímsson héldu þó ró sinni.
,,Við höfum ekki gert neitt ennþá. Við erum ekki ennþá komnir til Frakklands. Við höfum spilað þrjá leiki og þeir eru góður stökkpallur fyrir framhaldið," sagði Lars yfirvegaður að lokum.
