Enska landsliðið er í miklu uppáhaldi hjá mörgum Íslendingum en liðið ætlar sér stóra hluti á EM í ár.
EM hefst í kvöld á leik Þýskalands og Skotlands en England spilar sinn fyrsta leik gegn Serbíu á sunnudaginn. Liðið tapaði í úrslitum gegn Ítalíu á síðasta EM og ætlar sér skrefinu lengra í ár.
Óskar Hrafn Þorvaldsson er sérfræðingur á Rúv yfir mótið en hann hefur enga trú á enska liðinu eftir að liðið tapaði gegn Íslandi í síðasta vináttulandsleik sínum fyrir mótið.
„Maður er gegnsýrður af þessum enska bolta og enska landsliðinu. Ég hins vegar var á vellinum á England - Ísland. Þeir sem horfðu á þetta í gegnum sjónvarp - Þeir voru tíu sinnum lélegri live heldur en í gegnum sjónvarp, þeir voru óhemju lélegir. Það er erfitt á trúa því að þú getir verið svona lélegur og farið svo að berjast um Evrópumeistaratitilinn," sagði Óskar Hrafn.
