HK fór með 2-1 sigur af hólmi þegar liðið mætti KA í Kórnum í dag. Valgeir Valgeirsson skoraði sigurmarkið þegar stutt var eftir af leiknum.
Bjarni Gunnarsson, leikmaður HK, var kátur með stigin þrjú í leikslok.
Bjarni Gunnarsson, leikmaður HK, var kátur með stigin þrjú í leikslok.
Lestu um leikinn: HK 2 - 1 KA
„Þetta var kaflaskiptur leikur. Mér fannst við vera með tökin á þessu til að byrja með og við skorum gott mark. Þeir sköpuðu ekkert og voru ekki hættulegir, svo færum við þeim víti á silfurfati," sagði Bjarni Gunnarsson.
„Í síðari hálfleik taka þeir síðan aðeins tökin á leiknum en það var kærkomið að fá þetta annað mark frá Valla (Valgeiri) og mér fannst við sigla þessu vel heim. Við sýndum karakter og kláruðum þennan leik."
Bjarni fékk að líta beint rautt spjald í uppbótartíma leiksins. Atvikið gerðist alveg út í hornfána og því erfitt fyrir áhorfendur að sjá hvað nákvæmlega gerðist.
„Þetta var bara æsingur milli tveggja manna. Ég ætla ekkert að lýsa þessu nánar en ég er rólyndis maður og ég hefði ekkert brugðist svona við nema eitthvað hafi verið gert mér. Mér fannst hann brjóta frekar ógeðslega á mér fyrst og stundarbrjálæðin tók yfir hjá mér. Verðskuldað rautt á mig en mér finnst að hann hafi líka átt að fá rautt spjald," sagði Bjarni að lokum.
Nánar er rætt við Bjarna hér í spilaranum að ofan.
