Það kom mörgum á óvart að sjá nafnið Stefan Gartenmann í landsliðshópi Sviss í vikunni.
Gartenmann er 28 ára gamall varnarmaður og hefur aldrei spilað A-landsleik. Hann er fæddur í Danmörku og lék með yngri landsliðum Danmerkur.
Hann hóf feril sinn með Roskilde en fór ungur að árum til Heerenveen. Hann hefur einnig leikið með SonderjyskE, Midtjylland og Aberdeen. Í dag er hann leikmaður Ferencvaros í Ungverjalandi.
Hann hefur nú verið valinn í landslið Sviss en hann gat það þar sem hann á ættir sínar að rekja þangað í gegnum afa sinn. Murat Yakin, landsliðsþjálfari Sviss, hefur heillast af honum hjá Ferencvaros og valdi hann í hópinn fyrir leiki gegn Norður-Írlandi og Lúxemborg síðar í þessum mánuði.
Svissneska landsliðið er í 20. sæti á heimslista FIFA en Danmörk í 21. sæti svo Gartenman hefur valið að spila fyrir betra landslið eins og staðan er í dag.
Athugasemdir
