Sigurvin Ólafsson
„Já það er alltaf sama sagan og er orðið mjög þreytt að fá hrós fyrir einhverja góða frammistöðu. En að enda með núll stig er bara mjög sárt.“ Sagði Sigurvin Ólafsson þjálfari KV eftir 2-1 tap hans manna gegn Grindavík suður með sjó fyrr í kvöld.
Lestu um leikinn: Grindavík 2 - 1 KV
KV sem lék á köflum í leiknum vel fékk á sig klaufalegt mark í upphafi síðari hálfleiks sem á endanum reyndist skilja á milli liðanna í kvöld. Sigurvin ræddi það atvik.
„Já það var klaufalegt en ég held að boltinn hafi skoppað yfir fótinn á varnarmanninum og var mjög óheppilegt og mjög dýrt eins og við höfum verið að upplifa svolítið í þessari deild. Við höfum verið að fá á okkur nokkur óheppileg mörk.“
Gengi KV hefur ekki verið upp á marga fiska það sem af er sumri og stigasöfnun gengið illa. Hefur verið erfiðara fyrir Sigurvin að blása mönnum baráttuanda í brjóst eftir því sem á mótið hefur liðið?
„Ég hélt að það yrði erfiðara. Til dæmis núna eru menn inn í klefa upplitsdjarfir og stórir þrátt fyrir þetta. Það sem menn taka með sér eins lengi og það lifir er að vera hérna á heimavelli Grindavíkur í grindvísku veðri og að spila við þessar aðstæður á móti liði sem er með reynt lið í fyrstu og úrvalsdeild og þetta er bara leikur í járnum og við spilum þá sundur og saman seinni partinn í leiknum.“
Sagði Sigurvin en allt viðtalið má sjá hér að ofan.
