![Icelandair](/images/icelandair2_150x150px.png)
Það hefur átt sér stað frekar fyndinn misskilningur í útsendingu pólska sjónvarpsins frá leik Póllands og Íslands í undankeppni EM 2025 í kvöld.
Lestu um leikinn: Pólland 0 - 1 Ísland
Þau sem stjórna útsendingunni frá leiknum hafa verið dugleg að sýna það sem þau halda að sé landsliðsþjálfari Íslands.
Þau hafa hins vegar ekki verið að sýna réttan mann. Þorvaldur Ingimundarson, starfsmaður KSÍ, hefur verið mikið í mynd og einu sinni í útsendingunni var hann titlaður sem „landsliðsþjálfari Íslands".
Þorsteinn Halldórsson er auðvitað landsliðsþjálfari Íslands en það fer greinilega eitthvað minna fyrir honum en Þorvaldi á hliðarlínunni.
Þorvaldur starfaði lengi sem mikilvægur starfsmaður KSÍ í kringum kvennalandsliðið áður en hann hætti störfum 2022. Hann er að aðstoða liðið í þessu eina verkefni núna í júlí á meðan sambandið reynir að finna annan starfsmann í kringum liðið.
Okkar stelpur eru nú þegar komnar inn á mótið en þær eiga möguleika á því að vinna riðilinn með sigri í dag. Þær þurfa þó líka að treysta á það að Austurríki vinni eða geri jafntefli gegn Þýskalandi.
Steini eða Þorvaldur? Pólska ríkissjónvarpið þreytist ekki á að sýna Þróttarann geðuga Þorvald Ingimundarson í stað þjálfarans Þorsteins Halldórssonar. Er Þorvaldur kannski að stýra liðinu í dag? pic.twitter.com/QjL5JwnoKV
— RÚV Íþróttir (@ruvithrottir) July 16, 2024
Athugasemdir