Per Rud.
„Síminn hjá mér hefur ekki hætt að hringja síðan ég kom hingað en það er mikilvægt að taka það fram að Þróttur verður íslenskt félag með íslenska leikmenn. Kannski koma nokkrir leikmenn frá Danmörku en Þróttur verður ekki danskt félag í Reykjavík," sagði Per Rud nýráðinn yfirmaður knattspyrnumála hjá Þrótti við Fótbolta.net í gær um þær breytingar sem framundan eru hjá félaginu.
Þróttur vann sér sæti í Pepsi-deildinni núna í haust og að undanförnu hefur verið lögð vinna í að styrkja félagið inn á við. Óttar Edvardsson hefur verið starfandi framkvæmdastjóri en hann var áður hjá Val og þá réði félagið nýlega Þóri Hákonarson fyrrverandi framkvæmdastjóri KSÍ í starf íþróttastjóra og nú Per Rud sem var áður hjá Bröndby í Danmörku.
„Það getur enginn gert neitt einn, það þarf samvinnu til. En ég veit að með minni reynslu og annarra góðra einstaklinga sem við höfum hjá félaginu, Þóri frá KSÍ og Óttari, erum við með mjög reynda menn sem vinna í fullu starfi," sagði Per.
„Ég mun reyna að hraða ferlum þar sem fólk mun vinna faglegar. Við þurfum að búa til rauða línu frá yngstu leikmönnunum sem eru 5-6 ára og upp í meistaraflokk. Leikstíl og æfingar og slíkt. Það verður mitt hlutverk hérna."
„Svo mun ég auðvitað hjálpa til við meistaraflokkana svo Þróttur verði með stöðugt lið í efstu deild. En þegar þú byggir hús þá byrjarðu ekki á þakinu heldur grunninum. Við erum að gera það núna, það er gaman að vera hérna þó þetta sé mjög frábrugðið sem ég þekki til."
Viðtali má sjá í sjónvarpinu hér að ofan.
Athugasemdir
