Hashmin Musah átti óvenjulega innkomu í leik Inter Allies og Ashanti Gold í úrvalsdeildinni í Gana á laugardag en hann skoraði viljandi tvö sjálfsmörk í leiknum til að koma í veg fyrir hagræðingu úrslita.
Inter Allies var 5-0 undir gegn Ashanti Gold þegar Musah kom inn og skoraði tvö sjálfsmörk á síðustu tólf mínútunum áður en honum var síðan skipt af velli.
Hann sagði í viðtali eftir leik að hann hafi viljandi skoraði mörkin en hann taldi að það hafi verið fyrirfram ákveðið úrslit leiksins.
„Eftir leikinn þá komu stjórnarmenn til mín og skömmuðu mig fyrir að hafa eyðilagt veðmálið," sagði Musah við Kumasi FM.
„Ég lofaði þjálfaranum að ef hann myndi setja mig inná þá myndi ég eyðileggja veðmálið. Eftir leikinn þá hrósuðu liðsfélagarnir mér."
„Ég heyrði á liðshótelinu fyrir leikinn að það hafi verið lagt veðmál á að leikurinn færi 5-1 fyrir Ashanti. Ég ákvað að eyðileggja þetta því ég er á móti veðmálum á fótbolta," sagði hann ennfremur.
Ashanti Gold hefur alfarið neitað því að hafa tekið þátt í að hagræða úrslitum. Hægt er að sjá öll mörkin hér fyrir neðan og er eiginlega alveg óhætt að segja að eitthvað hafi verið átt við úrslitin í þessum leik.
All Ashanti Gold goals scored vs Inter Allies. I can't laugh enough
— Kofi Apply (@Kofi_Akwaboah) July 19, 2021
Ghana Premier League for you pic.twitter.com/bEuVKOL0IP
Athugasemdir