Besta deildin: Fyrirliðinn tryggði Blikum sigurinn - Hreinn úrslitaleikur í lokaumferðinni

Breiðablik vann Stjörnuna, 2-1, í næst síðustu umferð Bestu deildar karla á Kópavogsvelli í kvöld. Fyrirliðinn Höskuldur Gunnlaugsson tryggði sigurinn með marki undir lok leiks, en ljóst er að Breiðablik þarf sigur gegn Víkingi í lokaumferðinni til að vinna deildina.

Víkingsliðið vann dramatískan og umdeildan 4-3 sigur á Skagamönnum fyrr í dag og þurftu því Blikar að minnsta kosti að ná í stig í dag.

Blikar byrjuðu ágætlega gegn Stjörnumönnum. Höskuldur Gunnlaugsson, fyrirliði liðsins, átti skot sem hafnaði í stönginni, en eftir það fóru Stjörnumenn að ógna.

Guðmundur Baldvin Nökkvason kom boltanum í netið en var dæmdur rangstæður og síðan skapaði hann og Óli Valur Ómarsson tvö góð færi fyrir Emil Atlason, en hann skallaði boltanum framhjá í báðum færunum.

Stjörnumenn héldu áfram að keyra á Blika í þeim síðari. Anton Ari Einarsson var frábær í markinu. Hann varði skalla frá Guðmundi Kristjánssyni og nokkrum mínútum síðar dauðafæri frá Emil.

Þegar tæpur hálftími var til leiksloka kom Viktor Örn Margeirsson Blikum í forystu. Ísak Snær Þorvaldsson átti skalla í slá eftir hornspyrnu og datt boltinn fyrir Viktor sem potaði honum í netið.

Þrettán mínútum eftir markið svöruðu Stjörnumenn. Jón Hrafn Barkarson átti sendingu inn í teiginn á Emil sem náði skotinu, en það var varið. Stjörnumenn vildu fá vítaspyrnu í kjölfarið en Jóhann Ingi Jónsson, dómari leiksins, leyfði leiknum að fljóta og sem betur fer fyrir gestina því Heiðar Ægisson fékk boltann við teiginn og hamraði honum í markið.

Emil var nálægt því að koma Stjörnunni yfir aðeins þremur mínútum eftir markið en setti boltann framhjá úr dauðafæri. Heppnin ekki með honum í dag.

Þremur mínútum fyrir lok venjulegs leiktíma skoraði Höskuldur sigurmarkið. Kristinn Jónsson keyrði upp að endalínu, kom boltanum á Höskuld sem setti hann í varnarmann og í netið.

Lokatölur 2-1 á Kópavogsvelli. Blikar fara upp að hlið Víkings, en Íslandsmeistararnir eru með töluvert betri markatölu. Blikar þurfa því að vinna Víking í lokaumferðinni ef liðið ætlar að verða Íslandsmeistari, en Víkingum dugir stig.

Víkingur og Breiðablik mætast í Víkinni sunnudaginn 27. október en leikurinn hefst klukkan 18:30.