Sonur Pálma er á bekknum
Það ráku eflaust einhverjir upp stór augu þegar þeir sáu að hinn 14 ára gamli Alexander Rafn Pálmason væri í leikmannahópi KR gegn Breiðabliki í Bestu deild karla í kvöld.
Lestu um leikinn: Breiðablik 4 - 2 KR
Alexander er fæddur árið 2010 og því á eldra ári í 4. flokki en hann kom til KR frá Gróttu fyrir tveimur árum. Sumarið 2019 var hann meðal annars valinn í úrvalslið Orkumótsins í Vestmannaeyjum.
Í sumar hefur hann spilað fyrir þrjá flokka í KR og óvænt valinn í leikmannahóp meistaraflokks gegn Breiðabliki í kvöld.
Alexander er sonur Pálma Rafns Pálmasonar, þjálfara KR, en Pálmi mun stýra liðinu út þetta tímabil.
Pálmi tók við KR-ingum eftir að Gregg Ryder var látinn taka poka sinn en liðið hefur ekki unnið deildarleik síðan í lok maí.
Jón Arnar Sigurðsson er yngsti leikmaður til að spila fyrir KR er hann kom inn á í 4-0 sigri á ÍBV fyrir tveimur árum. Þá var hann 15 ára og 96 daga gamall, en Alexander myndi slá það met nokkuð örugglega ef hann kemur við sögu í kvöld.
Breiðablik er 2-0 yfir þegar lítið er eftir af fyrri hálfleiknum en Blikar fara upp í annað sætið ef þeim tekst að vinna KR-inga og verða þá aðeins þremur stigum á eftir toppliði Víkings.
Athugasemdir
