Í þýsku B-deildinni kom Hólmbert Aron Friðjónsson inn á sem varamaður á 35. mínútu og á 42. mínútu var hann búinn að koma liði sínu Preussen Münster yfir á heimavelli gegn Regensburg. Heimamenn bættu við öðru marki á 69. mínútu og urðu 2-0 lokatölur leiksins. Preussen komst með sigrinum upp af fallsvæðinu. Þetta var þriðja mark Hólmberts á tímabilinu og það fyrsta síðan í september. Leikurinn í dag var þriðji leikur Hólmberts á tímabilinu þar sem hann spilar meira en 35 mínútur.

Ágúst Eðvald Hlynsson skoraði fyrra mark AB í æfingaleik gegn Sundby. AB er í þriðju efstu deild í Danmörku en Sundby er deild neðar. AB fer aftur af stað í deildinni eftir vetrarfrí eftir tvær vikur. Ægir Jarl Jónasson er samherji Ágústs hjá AB og Jóhannes Karl Guðjónsson er þjálfari liðsins. AB er í 7. sæti C-deildarinnar þegar sex umferðir eru eftir fram að tvískiptingu.

Í dönsku B-deildinni vann Kolding 0-1 útisigur á Esbjerg. Ari Leifsson var ekki í leikmannahópi Kolding og Breki Baldursson var ónotaður varamaður hjá Esbjerg. Esbjerg er í 4. sæti deildarinnar sem stendur og Kolding er tveimur sætum og fjórum stigum á eftir Esbjerg. Ari var ekki með í leiknum þar sem hann og kærasta hans, Fanney Birna Steindórsdóttir, eignuðust dóttur í morgun

Norsku liðin Álasund og Levanger áttust við í æfingaleik í dag og var Davíð Snær Jóhannsson í byrjunarliði Álasunds. Davíð lagði upp fyrsta og þriðja mark Álasunds í dag með gæða fyrirgjöfum úr hornspyrnum. Hann spilaði fyrsta klukkutímann í dag og Ólafur Guðmundsson spilaði síðasta hálftímann í 6-1 sigri Álasunds.

Þá mættust Sogndal og Lyn sömuleiðis í æfingaleik í dag. Óskar Borgþórsson byrjaði á bekknum hjá Sogndal. Lokatölur í leiknum urðu 1-1. Það er rúmur mánuður í að tímabilið í Noregi byrji.

Sundby 0 - 2 AB Kaupmannahöfn

Esbjerg 0 - 1 Kolding

Preussen Münster 2 - 0 Regensburg

Norrköping 4 - 2 Örebro

Álasund 6 - 1 Levanger

Sogndal 1 - 1 Lyn