Totti tilbúinn til að gefa Dybala tíuna

Totti, sem er goðsögn í fótboltaheiminum og í guðatölu meðal Rómverja, lék allan ferilinn fyrir Roma og klæddist þar treyju númer 10.

Það hefur enginn fengið treyjuna hans Totti síðan hann lagði skóna á hilluna, svipað og hjá Napoli þar sem enginn hefur fengið tíuna síðan Diego Armando Maradona var þar eða hjá AC Milan þar sem þristurinn settist í helgan stein eftir að Paolo Maldini hætti.

Totti hefur miklar mætur á Paulo Dybala, leikmanni númer 10 hjá Juventus sem mun yfirgefa félagið á frjálsri sölu í sumar. Roma hefur verið orðað við Dybala og er Totti ánægður að verðugur arftaki gæti loks verið að ganga í raðir félagsins - sem hefur ekki unnið ítölsku deildina síðan 2001.

Totti og Dybala spiluðu góðgerðarleik saman fyrr í kvöld og ætlar Totti að reyna að sannfæra argentínska snillinginn um að flytja til Rómar.

„Við erum ekki ennþá búnir að ná að spjalla en við munum gera það seinna í kvöld. Ég myndi glaður gefa honum tíuna mína ef hann kæmi til félagsins - en það er ekki ég sem tek þær ákvarðanir," sagði Totti í kvöld.

Dybala er talinn vilja frekar ganga í raðir Inter heldur en Roma, en félög úr enska og spænska boltanum hafa einnig sýnt honum áhuga.