Reikna út 100% líkur á að Víkingur fari í Sambandsdeildina

Eftir 5-0 sigur Víkings gegn Santa Coloma frá Andorra hefur tölfræðisíðan Football Meets Data reiknað út að það séu 100% líkur á því að Íslandsmeistararnir klári dæmið og komist í deildarkeppni Sambandsdeildarinnar.

Víkingur hafði óhemju mikla yfirburði í gær og sigurinn hefði getað orðið mun stærri. Það eru ekki tölfræðilegir möguleikar á að Víkingur klúðri því að komast áfram og sjálfur sagði Arnar Gunnlaugsson þjálfari Víkings að stórslys þyrfti til að liðið færi ekki áfram í deildarkeppnina.

Það eru tvö önnur lið í umspili fyrir Sambandsdeildina sem eru talin alveg örugg áfram en það eru Cercle Brugge frá Belgíu og Omonoia frá Kýpur.

Seinni leikur Santa Coloma og Víkings verður næsta fimmtudag og daginn eftir verður svo dregið hvaða lið munu mætast. Eins og við höfum fjallað um þá er búið að leggja riðlakeppnina af og liðin keppa öll sín á milli í 36 liða deild þar sem 24 lið komast í útsláttarkeppni.

Víkingur mun leika sex leiki á móti sex mismunandi andstæðingum. Hvert lið fær þrjá heimaleiki og þrjá útileiki.