Í hverri Evrópukeppni eru 36 lið sem komast í lokakeppnina og raðast á eina deildartöflu, þrjú stig fyrir sigur og eitt fyrir jafntefli eins og við þekkjum, og af þessum 36 liðum eru 24 sem fara í útsláttarkeppni.

Í Sambandsdeildinni keppir hvert lið sex leiki á móti sex mismunandi andstæðingum (í Meistaradeildinni og Evrópudeildinni eru leikirnir átta). Hvert lið fær þrjá heimaleiki og þrjá útileiki.

Andstæðingarnir koma úr mismunandi styrkleikaflokkum og eru ákveðnir með drætti. Í Sambandsdeildinni er liðunum raðað upp í sex styrkleikaflokka.

Ef Víkingur kemst í deildina fær liðið sem dæmi einn andstæðing á heimavelli og annan á útivelli úr tveimur sterkustu pottunum og svona gengur þetta niður. Með þessu fyrirkomulagi ætti leikjaplanið að vera nokkuð sanngjarnt.

Að deildarkeppninni lokinni munu liðin í 1. - 8. sæti fara beint í 16-liða úrslit. Liðin í 9. - 24. sæti fara í tveggja leikja umspil um sæti í 16-liða úrslitunum. Liðin sem enda í neðar í deildinni falla úr leik.

Spennandi verður að sjá hvernig þetta nýja fyrirkomulag mun leggjast í fótboltaáhugamenn sem eru margir þeirrar skoðunar að riðlakeppnin hafi verið orðin þreytt.

Þeir, ásamt okkur íþróttafréttamönnum, þurfa líka að venja sig á því að hætta að tala um riðlakeppni heldur deildarkeppni þegar kemur að Evrópukeppnunum.

Víkingur mun á morgun leika fyrri leik sinn gegn Santa Coloma frá Andorra í umspili um sæti í deildarkeppni Sambandsdeildarinnar.