Thomas Tuchel, stjóri Chelsea, er opinn fyrir því að leyfa Werner að fara frá félaginu, en þýskir miðlar halda því fram að stjórinn sé ekkert sérstaklega hrifinn af landa sínum.

Werner byrjaði aðeins fimmtán deildarleiki fyrir Chelsea á síðustu leiktíð.

Hann kom til félagsins frá RB Leipzig fyrir tveimur árum en hefur síðan þá einungis gert 23 mörk í 89 leikjum.

Ítalska félagið Juventus er í viðræðum við Chelsea um Werner og er enska félagið opið fyrir því að lána hann. Viðræður munu halda áfram næstu daga. Werner og Alvaro Morata eru efstir á blaði hjá Massimo Allegri, þjálfara Juventus, en ítalska félagið er einnig í viðræðum við Atlético Madríd um Morata.

Newcastle United hefur einnig áhuga á að fá Werner en launakostnaður leikmannsins er að hindra félagið í að taka viðræðurnar á næsta stig. Werner þénar um 270 þúsund pund á viku hjá Chelsea.