Í dag og í kvöld fóru ýmsir landsleikir fram, meðal annars leikir í undankeppni fyrir Afríkukeppnina á næsta ári.
Naby Keita, miðjumaður Liverpool, skoraði þar mikilvægt mark í 2-3 sigri Gíneu á útivelli gegn Eþíópíu. Gínea er á toppi D-riðils með 9 stig eftir fjórar umferðir, þremur stigum fyrir ofan Mohammed Salah og félaga í Egyptalandi sem eiga leik til góða.
Þá gerði Simon Moses eina mark leiksins í gífurlega mikilvægum sigri Nígeríu á Gíneu-Bissá. Nígería þurfti sigur til að endurheimta toppsætið, eftir að hafa tapað fyrri leik liðanna 0-1 í Nígeríu.
Nígería getur svo gott sem tryggt sér toppsæti riðilsins með sigri á erfiðum útivelli Síerra Leóne í næstu umferð, sem er jafnframt næstsíðasta umferð undankeppninnar.
Riyad Mahrez var þá í byrjunarliði Alsír og lagði eina mark leiksins upp í sigri gegn Níger. Sigurinn innsiglar toppsæti riðilsins þar sem Alsíringar eru með fullt hús stiga eftir fjórar umferðir af sex.
Gínea-Bissá 0 - 1 Nígería
Angóla 1 - 1 Gana
Eþíópía 2 - 3 Gínea
Níger 0 - 1 Alsír
Þá fóru einnig vináttulandsleikir fram þar sem Norður-Makedónía rétt marði frændur okkar Færeyinga með einu marki gegn engu.
Grikkland gerði að lokum markalaust jafntefli við Litháen og Óman hafði betur gegn Líbanon.
Norður-Makedónía 1 - 0 Færeyjar
Grikkland 0 - 0 Litháen
Líbanon 0 - 2 Óman