Roma fékk Juventus í heimsókn í kvöldleiknum á Ítalíu og úr varð hörku leikur.

Fyrstu tvö mörk leiksins komu af vítapunktinum. Jordan Veretout skoraði á 31. mínútu en Cristiano Ronaldo jafnaði leikinn rétt fyrir hálfleik.

Veretout skoraði hins vegar einungis mínútu eftir að Ronaldo jafnaði og staðan því 2-1 fyrir heimamenn þegar flautað var til leikhlés.

Á 62. mínútu fékk Adrien Rabiot sitt annað gula spjald og gestirnir þurftu því að leika manni færri það sem eftir lifði leiks. Þeim tókst samt að jafna leikinn og að sjálfsögðu var það Ronaldo sem skoraði. Hann skallaði þá knöttinn inn eftir sendingu frá Danilo.

Jafntefli því niðurstaðan í Róm og er Juventus með fjögur stig eftir tvo leiki en Roma er með eitt.