FH-ingar voru sprækir í fyrri hálfleiknum gegn Blikum. Þeir voru mun sprækari í fyrri hálfleiknum og fengu nokkur færi til að skora. Sigurður Bjartur Hallsson kom sér í dauðafæri strax í byrjun leiks, en sendi boltann í stað þess að skjóta þó enginn FH-ingur hafi verið með honum.

Böðvar Böðvarsson kom sér í annað dauðafæri fyrir FH-inga eftir sendingu frá Kjartani Kára Halldórssyni, en setti boltann himinhátt yfir markið.

Óli Valur Ómarsson átti besta færi Blika í fyrri hálfleiknum eftir sendingu frá Ágústi Orra Þorsteinssyni en Óli náði ekki að stýra boltanum á markið úr algeru dauðafæri.

Staðan í hálfleik markalaus, en FH-ingar komust í forystu þegar seinni hálfleikurinn var ellefu mínútna gamall. Baldur Kári Helgason kom boltanum inn á teiginn og var það Tómas Orri Róbertsson sem skaut óverjandi skoti í hornið.

Blikar fóru að sækja meira þegar leið á leikinn og dró til tíðinda á 88. mínútu er Guðmundur Magnússon jafnaði metin aðeins nokkrum mínútum eftir að hafa komið inn á.

Rétt eftir markið fékk Mathias Rosenörn, markvörður FH, að líta rauða spjaldið í kjölfarið. FH var búið með skiptingarnar og þurfti Sigurður Bjartur að klæða sig í markmannshanskana. Hann stóð sig vel á lokamínútunum og handsamaði allt sem kom að honum.

Lokatölur 1-1. Breiðablik er með 36 stig í 4. sæti á meðan FH er í 5. sæti með 32 stig.

Skagamenn unnu fallbaráttuslaginn gegn KR

ÍA vann KR, 3-2, í fallbaráttuslag á Akranesi eftir svakalegar lokamínútur.

Tvö lið sem eru með þeim stærstu í Íslandssögunni að mætast í fallbaráttuslag er eitthvað sem hljómar hálf súrrealískt, en þannig er staðan.

Leikurinn bauð upp á mikla ákefð og baráttu eins og við var að búast.

Skagamenn tóku forystuna á 36. mínútu. Jón Gísli Eyland Gíslason átti innkast á Hauk Andra Haraldsson sem setti boltann aftur út á Jón Gísla. Hann kom með lága fyrirgjöf á Marko Vardic sem sneri baki í markið og náði að hæla hann í netið.

KR-ingar fengu draumabyrjun á síðari hálfleiknum er vítaspyrna var dæmd á Árna Marinó Einarsson, markvörð Skagamanna. Dómurinn var kolrangur því Árni náði að bjarga frábærlega með tæklingu sinni, en KR-ingar kvörtuðu ekki.

Aron Sigurðarson skoraði af punktinum og jafnaði leikinn. Mikilvægt jöfnunarmark en undir lokin tókst Skagamönnum að gera út um leikinn á nokkrum mínútum.

Viktor Jónsson skoraði með skalla eftir hornspyrnu Jóns Gísla á 82. mínútu og tveimur mínútum síðar tryggði Gísli Laxdal Unnarsson sigurinn. Viktor slapp í gegn, fór framhjá Arnari Frey Ólafssyni áður en hann setti boltann á Gísla sem skoraði.

Aron Sig skoraði sárabótarmark þegar lítið var eftir af leiknum en lengra komust KR-ingar ekki.

Magnaður sigur Skagamanna sem eru nú fjórum stigum fyrir ofan fallsæti þegar þrjár umferðir eru eftir, en KR-ingar í næst neðsta sæti þremur stigum frá öruggu sæti. Allt stefnir í fall hjá KR, en vissulega margt sem á eftir að gerast í þessum þremur umferðum sem eftir eru.

Úrslit og markaskorarar:

ÍA 3 - 2 KR
1-0 Marko Vardic ('36 )
1-1 Aron Sigurðarson ('53 )
2-1 Viktor Jónsson ('82 )
3-1 Gísli Laxdal Unnarsson ('84 )
3-2 Aron Sigurðarson ('96 )
Lestu um leikinn

FH 1 - 1 Breiðablik
1-0 Tómas Orri Róbertsson ('56 )
1-1 Guðmundur Magnússon ('88 )
Rautt spjald: Mathias Brinch Rosenorn, FH ('89) Lestu um leikinn