Valur 2 - 1 Stjarnan
Ef einhvern tímann þá ætti Stjarnan að geta strítt Val - og jafnvel stolið þessu - í kvöld þar sem Garðbæingar hafa verið í miklu hópefli yfir EM meðan Valshópurinn var að einhverju leyti sundraður með leikmenn úti á mótinu. Ég veit hins vegar að Pétur hefur haldið uppi ströngum aga hvað æfingar varðar á Hlíðarenda síðustu vikurnar. Ég ætla að gefa mér að landsliðskonurnar smelli rétt stemmdar inn í hópinn aftur og Valur klári þetta, 2-1.

Breiðablik 4 - 0 KR
KR-ingar unnu síðasta leik fyrir hlé en ég held því miður að þær séu ekki að fara að sækja neitt í Kópavoginn í kvöld. Blikar voru á mikilli siglingu fyrir EM og landsliðskonurnar í hópnum tóku Öglu Maríu með sér aftur heim svo þær eru bara orðnar sterkari. Breiðablik vann fyrri leik liðanna 4-0 og ég held að það verði eitthvað svipað uppi á teningnum í kvöld.

Þessi umferð - 13. umferðin - klárast svo 16. ágúst með þremur leikjum. Þessir tveir leikir eru spilaðir fyrr þar sem Breiðablik og Valur eru að fara að taka þátt í Meistaradeildinni. Seinna verður spáð í hina þrjá leikina sem eru í þessari umferð.