Síðustu leikjum dagsins er lokið hjá atvinnukonunum okkar sem leika erlendis.
Amanda Andradóttir kom inn af bekknum í þægilegum sigri FC Twente á útivelli gegn PEC Zwolle í efstu deild í Hollandi.
Amanda spilaði síðasta stundarfjórðunginn í 1-4 sigri og er Twente með fullt hús stiga eftir þrjár fyrstu umferðirnar á nýju tímabili.
Ísabella Sara Tryggvadóttir var þá ónotaður varamaður er Rosengård steinlá á heimavelli gegn Brommapojkarna í efstu deild í Svíþjóð.
Liðin mættust í mikilvægum fallbaráttuslag og situr Rosengård eftir í fallsæti.
Að sama skapi sat Telma Ívarsdóttir á bekknum hjá Rangers í tapi í grannaslagnum gegn Glasgow City í efstu deild í Skotlandi. Telma er varamarkvörður hjá Rangers, sem var að tapa sínum fyrsta leik á deildartímabilinu.
Rangers deilir öðru sætinu með Celtic, þar sem bæði lið eiga 16 stig eftir 7 umferðir. Glasgow er á toppinum með fullt hús stiga eftir 6 spilaða leiki.
Zwolle 1 - 4 Twente
Rosengard 2 - 5 Brommapojkarna
Rangers 0 - 1 Glasgow City
Athugasemdir
