ÍBV er svo gott sem hólpið eftir að liðið vann sannfærandi 5-0 sigur á bikarmeisturum Vestra í neðri hlutanum í Bestu deild karla á Kerecis-vellinum á Ísafirði í dag.

Eyjamenn hafa verið á ágætis flugi í síðustu leikjum á meðan Vestri hafði ekki unnið leik síðan í byrjun ágúst.

Sigurður Arnar Magnússon skallaði Eyjamönnum í forystu á 10. mínútu eftir aukaspyrnu Alex Freys Hilmarssonar.

Á síðustu mínútum fyrri hálfleiks gengu gestirnir endanlega frá Vestra með þremur mörkum. Hermann Þór Ragnarsson skoraði á 41. mínútu er hann hljóp inn í slaka sendingu Diego Montiel til baka, fór framhjá Guy Smit í markinu og skoraði, og bætti síðan við öðru marki sínu eftir stoðsendingu frá Oliver Heiðarssyni.

Hermann endurlaunaði Oliver greiðann stuttu síðar með laglegri hælspyrnusendingu inn á Oliver sem lyfti boltanum framhjá Guy í markinu og staðan 4-0 Eyjamönnum í vil.

Það var aðeins meiri kraftur í Vestra-liðinu í þeim síðari sem reyndi að gera allt til að komast aftur í leikinn, en það vantaði mörkin hjá heimamönnum.

Hermann Þór sýndi þeim hvernig á að gera þetta er hann fullkomnaði þrennu sína á 84. mínútu. Vestri tapaði boltanum og var það Vicente Valor sem kom boltanum inn á Þorlák Breka Baxter sem fann síðan Hermann Þór og í netið fór boltinn. Sjötta mark Hermanns í deildinni.

Stór og mikilvægur sigur Eyjamanna sem fara á toppinn í fallriðlinum með 33 stig en Vestri í þriðja neðsta sæti riðilsins með 27 stig, þremur stigum fyrir ofan fallsvæði þegar þrjár umferðir eru eftir.