Spánn: Hazard með flott mark í öruggum sigri

Real Madrid tók á móti Huesca í fyrsta leik dagsins í spænska boltanum og var Eden Hazard í byrjunarliðinu.

Hazard átti fína frammistöðu og skoraði fyrsta mark leiksins með laglegu vinstrifótarskoti. Karim Benzema tvöfaldaði forystuna skömmu síðar og staðan 2-0 í leikhlé.

Benzema lagði svo upp þriðja markið með frábærri sendingu á Federico Valverde og minnkuðu gestirnir ekki muninn fyrr en á 75. mínútu.

Real var áfram með stjórn á leiknum og gerði Benzema fjórða mark heimamanna á lokamínútunum.

Real vann því 4-1 og er á toppi deildarinnar með 16 stig eftir 7 umferðir. Huesca er aðeins með 5 stig eftir 8 umferðir.