Hollendingurinn hefur fengið lítið af tækifærum undir stjórn Solskjær og sat á tréverkinu gegn Villarreal en það vakti athygli er hann tók út úr sér tyggjóið og kastaði í jörðina þegar það var ljóst að hann væri ekki á leið inná völlinn.

Það hefur mikið verið rætt um stöðu Van de Beek hjá United en Solskjær þekkir það betur en flestir að sitja á bekknum.

„Ég er að þjálfa hóp sem er með fullt af landsliðsmönnum með mikið keppnisskap sem vilja hafa áhrif og spila. Þeir vilja allir vera á vellinum, eðlilega," sagði Solskjær.

„Donny var klár í að koma inná, eins og allir leikmenn eiga að vera. Ég hef verið varamaður oftar en allir hjá þessu félagi. Ég á eflaust metið og þú verður alltaf að vera klár. Það hefur oft verið þannig þar sem ég var alls ekki sáttur en þetta er bara ákvörðun sem stjórinn tekur."

„Telles var að koma af velli sem bakvörður og Fred leysti það hlutverk vel. Ég skil pirringinn, allir vilja spila, en það byggir upp orku og ákveðni í að þegar þú kemur inná þá sýnir mér hvað þú getur. Þetta er ekki bara Donny, heldur allir leikmennirnir."

„Ég er með hóp af landsliðsmönnum og ef við ætlum að ná árangri saman þá verðum við að vera með jákvæða orku, við höfum ekki orku fyrir fýlupúka. Donny hefur aldrei haft neikvæð áhrif á hópinn, bara svo því sé haldið til haga, en um leið og ég sé leikmenn hafa neikvæð áhrif á hópinn þá er það annað mál. Þá mun ég taka aðeins harðar á því," sagði hann í lokin.