Íslendingalið FCK gjörsamlega keyrði yfir hollenska félagið Feyenoord, 7-0, í æfingaleik í dag en Hákon Arnar Haraldsson og Ísak Bergmann Jóhannesson komust báðir á blað. Þá skoraði Jón Daði Böðvarsson fyrir Bolton Wanderers.
Hákon Arnar, sem átti frábæran lokasprett með FCK á síðasta tímabili, var í byrjunarliði FCK í dag. Hann átti þátt í þremur mörkum liðsins.
Hann gerði þriðja markið og átti svo stóran þátt í sjötta markinu er hann sendi boltann á Ísak Bergmann lagði boltann fyrir William Boving sem skoraði.
Ísak gerði svo sjöunda markið og auðvitað var það besti vinur hans, Hákon, sem lagði það upp. Glæsilegur 7-0 sigur og undirbúningstímabilið fer vel af stað. Orri Steinn Óskarsson kom inná sem varamaður í leiknum.
Aron Sigurðarson og Aron Elís Þrándarson komu báðir við sögu er Horsens vann OB 3-1 í æfingaleik.
Atli Barkarson og Ísak Óli Ólafsson mættust þá er SönderyskE og Esbjerg gerðu 1-1 jafntefli. Lærisveinar Freys Alexanderssonar í Lyngby unnu 2-0 sigur á Nykobing.
Stefán Teitur Þórðarson var þá í liði Silkeborg sem lagði St. Pauli að velli, 2-0.
Guðlaugur Victor spilaði hálfleik í stórsigri og Jón Daði á skotskónum
Guðlaugur Victor Pálsson og hans menn í Schalke unnu 7-0 stórsigur á Lohne. Guðlaugur spilaði fyrri hálfleikinn en Schalke undirbýr sig fyrir endurkomu í efstu deild.
Jón Daði Böðvarsson gerði annað mark Bolton Wanderers í 3-1 sigri á Chorley. Hann gerði mark sitt með skalla undir lok fyrri hálfleiks en honum var skipt af velli í hálfleik.
Sverrir Ingi Ingason var í liði PAOK sem tapaði 2-1 fyrir Groningen í æfingaleik og þá lék Jóhann Berg Guðmundsson í 1-0 sigri Burnley á Rochdale í gær.
Óttar Magnús Karlsson, markahæsti leikmaður USL-deildarinnar í Bandaríkjunum, spilaði allan leikinn í 3-1 tapi Oakland Roots gegn varaliði Los Angeles Galaxy í nótt. Oakland er í 9. sæti Vestur-deildarinnar.
Ögmundur Kristinsson stóð í marki Olympiacos í 3-1 tapi gegn Arminia Bielefeld í gær.
Athugasemdir