Deniz Yaldir, leikmaður Vestra á Ísafirði, var ánægður með 2-0 sigurinn á Njarðvík í Lengjudeildinni í dag.
Lestu um leikinn: Vestri 2 - 0 Njarðvík
Yaldir, sem kom til Vestra fyrir síðasta tímabil, spilaði í vinstri bakverði í dag þegar liðið varðist og færði sig inn á miðju þegar það var að sækja.
Hann var ánægður með þetta hlutverk og var einn af bestu mönnum leiksins.
„Þetta gerðist seint í vikunni. Ég var færður í vinstri bakvörðinn og síðan í djúpan miðjumann þegar við fengum boltann þannig ég gæti fengið boltann meira. Til að stjórna tempói-inu aðeins en ég er fjölbreyttur leikmaður og get spilað margar ólíkar stöður og spila bara þar sem þjálfarinn setur mig.“
Yaldir ræddi aðeins atvikið er Robert Blakala, markvörður Njarðvíkur, var rekinn af velli fyrir að handsama boltann fyrir utan teig.
„Ég veit ekki hvað hann var að gera en svona er fótbolti og þetta getur gerst. Stundum er allt tekið úr sambandi en svona er fótbolti og við erum ánægðir með stigin þrjú,“ sagði hann í lokin.
